Xətai rayonunda 22 yaşlı qadını küçədə bıçaqla öldürməkdə, rəfiqəsinə isə xəsarət yetirməkdə ittiham olunan Səbuhi Qürbətovun məhkəmə araşdırması başa çatıb.

Titul.az qafqazinfo-ya istinadən xəbər verir ki, işə Bakı Ağır Cinayətlər Məhkəməsində baxılıb.

Məhkəmədə məlum olub ki, qətlə yetirilən Elnarə Cabbarova ilə Səbuhi sevgili olub.

Hadisədən əvvə onlar bir yerdə yaşayıb. Günlərin birində aralarında yaranan mübahisəyə görə Səbuhi Elnarənin paltarlarını küçəyə atıb. Bundan sonra yaşananlar isə cinayətə gətirib çıxarıb: 

"Telefonda dalaşdıq, məni təhqir etdi. Buna dözə bilməyib evlərinin önünə gəldim. Amma yenə nalayiq sözlər işlətdi. Bu vaxt onu qucaqlayıb kürəyindən bıçaqladım. Peşmanam".

Məhkəməyə sədrlik edən hakim Azər Tağıyev baş verənlərə görə təqsirləndirilən şəxsi qınayaraq, "bilirsən ki, kasıb və heç kəsi olmayan qızdır. Yaxşı, bu hansı kişiliyə sığır ki, sən uzun müddət bir yerdə yaşadığın qızın əşyalarını yığ, tulla çölə...budur sevgi?, - deyib.

Cinayət isə səhər saatlarında iri marketlərdən birinin qarşısında baş verib.

Belə ki, Səbuhi restoranda ofisiant işləyən sevgilisini ondan ayrılmaq istədiyinə görə 18 bıçaq zərbəsi ilə öldürüb. Bundan sonra onun rəfiqəsinə və özünə eyni bıçaqla yüngül xəsarət yetirib.

Elnarənin yaxınları Səbuhiyə qanunun icazə verdiyi ən ağır cəzanın təyin olunmasını xahiş edib.

Bu gün sonuncu iclasda hökm oxunub.

Hökmə əsasən, Səbuhi xuliqanlıq niyyəti ilə xüsusi amansızlıqla adam öldürməkdə və qəsdən sağlamlığa yüngül zərər vurmaqda təqsirli bilinərək 18 il 6 ay müddətinə azadlıqdan məhrum edilib.

16:21 - 17 Oktyabr 2024