Bakının Xətai rayonunda baş verən güclü yanğın davam edir. 13:30-da başlayan yanğın barədə Respublika Təcili və Təxirəsalınmaz Tibbi Yardım Mərkəzinə məlumat daxil olub.
Titul.az xəbər verir ki, hazırda BAKU.TV-nin çəkiliş qrupu hadisə yerindədir. Verilən məlumata görə, yaxınlıqda avtomobillər yanaraq külə dönüb və yanğın nəticəsində bir nəfər xəsarət alıb.
Hadisə yerinə 6 təcili tibbi yardım cəlb edilib. Hazırda ərazidə FHN işini davam etdirir.
Qeyd edək ki, paytaxtın Xətai rayonu, Süleyman Əhmədov küçəsində yanğın başlayıb.
Daxili İşlər Nazirliyindən bildirilib ki, yanğın səbəbindən 8 Noyabr prospektindən qeyd olunan küçə istiqamətində nəqliyyat vasitələrinin hərəkətinə məhdudiyyət tətbiq edilib: "Yanğınla əlaqədar polis əməkdaşları hadisə yerinə cəlb edilib. Polis əməkdaşları ərazini mühafizə edərək təhlükəsizlik tədbirləri görür".
FHN-dən verilən məlumata görə, məlumatla əlaqədar nazirliyin müvafiq xilasetmə qüvvələri çağırış üzrə cəlb olunublar.
Qeyd olunub ki, hazırda yanğınsöndürmə işləri həyata keçirilir.
15:17 - 27 Sentyabr 2024